【古乱传】有茶唔城畀厓食（客家话版，咸古）

泉之声

　　今网络信息多，齐家就算
唔买书，上网野知揭西系属于半山客。最最典型最最半介就属灰寨辽。脉介安到“半山客”？大道理笛哩就唔讲辽，就看“半山”两只字，至少可以咹得理解：揭西
有城兜客家人走出山窦肚辽。河婆大区龙潭人，走出桐树坪，翻过大山，来到龙潭，屋背后系山，屋面前系平洋，“半山”啊。
　　河婆细区介河婆人祖先经过勤俭进取，占据了河婆盆地中心，使得好多河婆后人唔使再跍笛山窦肚，慢慢河婆后人就渐渐得意起来，一般都唔承认躸家系山哩人，尽管出过门哩也知河婆系个山城。
　
　由于生活交融、文化交流，河婆客家人吸收城兜福老文化，也同化城兜学老人——如溪角人。又带有躸家介客家文化，调和出一种独特介“半山客”或者“半山
学”文化，就恁躸家孝有文化，飘飘然。用躸家介优越地域笑该兜还吂走出大山介客家人“山拐”，也用躸家介客家文化窝习俗，笑福佬人“学老拐”。独尊河婆，
看唔起四邻。
　　到处捞四邻安花名，除“山拐”、“学老拐”哩兜之外，长乐人到河婆人介喙肚就变“长乐猴”——“长乐猴，剥哩皮还晓跳”哩句煨相信有兜人都晓讲。过哩坪门径，五云径下田心坝该兜原陆丰人，落河婆圩都变成“海丰猓”。哩个“猓”字唔读“哥”，还按[谷划切]读【gwak】！“gwak”系脉个意思呢？系传说中介长尾猴！良田上砂就喊“良田拐”、“上砂拐”，客气声时喊声“良田哥”，但“哥”字有时还唔好好念，念【gog6】（音类郭，意同‘猓’）。
　　今家四周介经济都发展，揭西人也好河婆人也好，开始有滴知躸家冇脉介本钱好笑碧撒辽，出门奔人看衰介味道也知得辽。
　　厓细声时听有好多笑话故事古乱传，一直都唔敢拿到网上来讲。茶农该几只老兄也唔识讲过，可能佢兜沙窝厓介顾虑参唔多，为因该兜故事都带城兜今下看来有地域攻击介味道。五云上砂良田都是躸家揭西兄弟，怕伤感情介嘛，五华陆丰丰顺今也笑唔得辽。
　　今想将该兜故事牵涉到介地名隐去，作个纯粹介故事来讲。齐家看声时就唔妹联想系嚟往人啊。
故事一：有茶唔城奔厓食
　
　梗鳞河婆圩卖樵卖莦（音烧）卖碳介地方系笛猪狸岗角头，卖樵介人一般都朝晨头早早，三四点钟就出门，吂开圩就摡到河婆圩辽。有次热天时，一个下圩老伯咩
去买樵，择（音托）好买正哩问卖樵介细后生：“厓拿唔转去，杏窝厓摡雅屋咔去么？”，细后生话好，摡起樵藤老伯咩落下圩去辽。
　　到老伯咩屋咔，细后生将樵放灶头角去，收好担杆索，捽下额门头介汗，问老伯咩：“厓屋咔出来到斤闲吂食水，渴到死，尊杯水厓食好么？”
　　“哦，系喔系喔，仪落雅门还吂奔茶仪食，看厓老颠东。唔凑巧吂烧有滚水，厓今就烧。”
　　“唔使，奔冷水厓食就好辽。”
　　“唔好唔好，冷水食哩屙涝肚。仪先去厅下坐下哩，一虾下就滚。”老伯咩兔细后生出到客厅，请佢坐落竹椅，就落后格烳滚水。
　　卖樵介后生哥坐落哩四下看，看看传说中河婆圩人住介屋系犸生样，看下看哩针顾到细几有个茶托，茶托有茶杯茶壶，打开壶盖，冇水。咦！茶盘脚下做迈还有个碗？打开茶盘看下哩。
　　打开茶盘，哇，一大钵红津津介茶汤！清凉清凉。后生哥想都冇想，掇其钵将茶汤全嗗落肚去。然后徛起身来，话“叔咩，厓走喽啊。”
　　下圩老伯咩听倒猛猛跰出来，话：“走做迈？仪唔系肚屎渴么？一下就滚辽。”出来野看，后生哥都唔见踢辽，孤孤听到门背传来：“今唔渴辽，厓走了啊。”
　　后来，听讲，该只后生哥就有兜看唔起河婆圩人，讲到河婆圩人就话：“河婆圩人皱涩到死，有茶唔城奔厓食，囥茶盘脚下造去烧滚水！”